أرقام بتقول لك تعمل إيه بكرة
التقارير مش حيطة ألوان بتتفرج عليها. بتستاهل مكانها لما ترد على أسئلة محددة: الإيراد طالع ولا نازل، أنهي منتج شادّ وأنهي واقف، الزائر بيقع فين في الطريق للدفع، ومين رجع اشترى تاني. وفلوس الدفع عند الاستلام دي لسه مع شركة الشحن ولا وصلت. كل ده متحسب من طلباتك ومن زيارات متجرك، من غير ما تركّب حاجة.
بيعمل إيه بالظبط
الإيراد على الوقت
منحنى للإيراد وعدد الطلبات ومتوسط قيمة الطلب على الفترة اللي تختارها، مع توزيع طرق الدفع على إحدى عشرة طريقة مستخدمة في مصر — من البطاقة والدفع عند الاستلام لفودافون كاش وفوري وإنستاباي والتحويل البنكي. والإيراد بيحسب الطلبات اللي اتدفعت فعلًا وبيخصم منها المبالغ المرتجعة، فالرقم مش منفوخ.
فلوس الدفع عند الاستلام
تلات أرقام بتفصل حاجة أغلب المنصات بتخلطها: كام لسه في انتظار التحصيل، كام اتحصّل وفي الطريق لك، وكام وصلك فعلًا. الفرق بين التاني والتالت هو فلوسك اللي لسه برة إيدك.
المنتجات
أفضل المنتجات مبيعًا لحد خمسين منتج، مرتبين بالإيراد أو بالكمية، وكل منتج ليه صفحة اتجاه بتوريك أداءه على الوقت. وقايمة بأكتر المنتجات اللي اتساب في سلة من غير ما تتشترى.
العملاء ورجوعهم
عملاء جدد مقابل راجعين، متوسط قيمة العميل على عمره، وجدول رجوع بيجمّع العملاء حسب شهر أول طلب ويوريك كام واحد منهم رجع بعد شهر وشهرين وتلاتة وستة. ده الجدول اللي بيقول لك إنت بتكسب عملاء ولا بتأجّرهم.
الزيارات ومصادرها
عدد الزوار والمشاهدات ونسبة التحويل، ومن فين جايين — مقسّمين على المواقع اللي جابتهم. وأكتر المنتجات اللي اتشافت مع نسبة تحويل المشاهدة لإضافة للسلة، وأكتر الكلمات اللي الزوار دوّروا بيها جوه متجرك، وده بيقول لك حاجة إنت مش هتعرفها من أي مكان تاني: الناس بتدوّر على إيه عندك وما بتلاقيهوش.
السلات المتروكة
عدد السلات اللي اتسابت وقيمتها، وكام واحدة منهم رجعت واتحوّلت لطلب، ونسبة الاسترجاع — مع أكتر المنتجات اللي بتتساب.
مقارنة بمتاجر زيك
أرقامك مقابل متوسط متاجر في نفس مجالك وحجمك، على عشر مؤشرات منها متوسط قيمة الطلب ونسبة العملاء الراجعين ونسبة الإلغاء ونسبة الدفع عند الاستلام ونسبة نجاح التسليم. مجهّل بالكامل، ومحتاج عدد كافي من المتاجر المشابهة علشان يظهر.
بيشتغل إزاي
بيع
مفيش حاجة تتركّب. كل طلب وكل زيارة بيتسجلوا لوحدهم.
افتح التحليلات
من لوحة التحكم ← التحليلات: نظرة عامة، تسويق، منتجات، عملاء، مقارنة، وبيكسلات الإعلانات.
اختار الفترة
النهاردة، آخر سبع أيام، أو آخر تلاتين يوم.
انزل للتفاصيل
من الملخص للمنتج نفسه، أو لجدول رجوع العملاء، أو لمصادر الزيارات.
ده مناسب لمين
- أي تاجر بيصرف على إعلانات ومحتاج يعرف الفلوس بترجع ولا لأ.
- متاجر بكتالوج كبير محتاجة تعرف أنهي منتج يستاهل مخزون أكتر.
- متاجر بتشتغل دفع عند الاستلام ومحتاجة تعرف فلوسها فين بالظبط.
- أي حد شايف زيارات كتير وطلبات قليلة وعايز يعرف الناس بتقع فين.
أسئلة متكررة
الأرقام لحظية؟
مش بالثانية. النتايج بتتخزّن مؤقتًا حوالي خمس دقايق علشان الصفحات تفتح بسرعة، يعني الطلب اللي نزل دلوقتي ممكن ياخد دقايق لحد ما يظهر.
ليه الإيراد مختلف عن مجموع طلباتي؟
لأن الإيراد بيحسب الطلبات المدفوعة بس — مقدمًا أو محصّلة عند التسليم أو موّردة — وبيخصم المبالغ المرتجعة. الطلب اللي ما اتدفعش أو اتلغى مش بيتحسب إيراد.
أقدر أختار فترة بتاريخ مخصص؟
لأ، مش لسه. الفترات المتاحة هي النهاردة وآخر سبع أيام وآخر تلاتين يوم، وشاشة المقارنة عندها تلاتين وتسعين يوم.
أقدر أنزّل التقارير كملف؟
قايمة العملاء تقدر تنزّلها كملف من شاشة العملاء. تنزيل تقارير الإيراد والطلبات من شاشة التحليلات لسه مش شغال، وبنشتغل عليه.
محتاج جوجل أناليتكس؟
مش بالضرورة. هيكانا بيسجّل زيارات متجرك وأحداثه بنفسه. ولو عندك بيكسل فيسبوك أو تيك توك، فيه شاشة تربطهم منها.